NG Kerk

Die NG Kerk is deesdae alweer gereeld in die nuus; en nie noodwendig in ‘n positiewe sin nie.  Lina Spies kondig aan dat sy bedank uit die NG Kerk omdat sy nie meer in die opstanding, en dus eintlik ‘n verstarde kerk kan glo nie.  Die hele debakel rondom die Woord-fees in Stellenbosch en of Jean Oosthuizen se afdanking (of dan kerkpaaie skei) eties en geregverdig is….en Prof Jansen, vir wie ek geweldig respek het, wat die NG Kerk nog rassisties noem omdat die NG Kerk sukkel om eenheid onder die verskillende ras-kerke kan bewerkstellig.

Hoekom ek vandag hieroor iets wil sê is omdat die relevansie van die kerk vir my persoonlik, ‘n vraagteken geword het.  Maar aan die ander kant, is daar tog ‘n ruimte vir die kerk volgens die Bybel.  So wat moet ons dink, doen oor die kerk?

Kom ek sê wat maal in my kop rond……  Die NT gelowiges groei dag by dag, volgens Handelinge.  Hulle kom spontaan in huiskerke bymekaar waar hulle mekaar vertroos en aanspoor.  Later skryf die Hebreërskrywer dat ons nie die samekomste van die gemeente moet nalaat nie.  Paulus skryf briewe aan verskillende gemeentes, soos hulle gevorm het oor die jare.  Maar kerk en gemeente soos ons dit vandag ken, was waarskynlik nie wat in die NT gelowiges se wêreld was nie.  Inderdaad het in kerk-wees en gemeente-wees ook, soos die jare aangestap het, ontwikkeling plaas gevind, kennis toegeneem, verander plaasgevind en ‘n instelling geword soos ons dit vandag ken.  Of dit goed was/is of sleg, weet ek nie.  As ek na die kritiek kyk wat op verskillende kerke in verskillende kulture voorkom, is daar inderdaad dinge wat nie goed is nie, en wat nie goed uitgedraai het nie.  Die RKK beleef tans druk en kritiek oor bewerings van korrupsie, magsmisbruik en seksuele misbruike.  Die Amerikaanse “Evangelicals” word skerp gekritiseer oor hul Bybel interpretasie, en die manier hoe Christenskap uitgebeeld word.  Die NG Kerk gaan gebuk onder kritiek.  En so kan ons in elke land en kultuurgroep talle voorbeelde noem.  Die punt is dus:  wat beteken kerk en gemeente-wees vandag in vergelyking met wat dit vir die NT gelowiges was?  Miskien as ons daai vraag kan beantwoord, kan ons dalk by antwoorde kom.

Nog iets wat my die afgelope tyd laat wonder het hieroor is die “bagasie” wat oor die jare bygevoeg is soos tyd aangesstap het – bagasie soos moralisme, ‘n nuwe stel morele reëels waaraan voldoen moet word (wettissisme), gebruike wat presies nié verteenwoordig wat Jesus dalk bedoel het met die kerk nie; genadeloosheid, ‘n ingekeerdheid i.p.v. tot die wêreld-gerigtheid.  En baie gemeentes, leiers, kerke, mense loop nog met daardie basis rond van kerk-wees en verwag dat kerke so moet funksioneer.  En dikwels, veral as ek na sommige debatte rondom die Belhar belydenis lees, of as ek lees oor kritiek teenoor die kerk, kan ‘n mens sien dat dit nog die verwysingspunt is.

Dit is wat my laat wonder het toe ek onlangs met iemand in gesprek was oor die kerk: het die kerk soos ons dit vandag ken, nog enige relevansie?  Ek sê nie dat kerk nie Bybels is en totaal afgeskaf moet word nie.  Ek vra of die kerk soos ons dit vandag ken, nog ‘n behoefte vervul, relevansie het.  Jongmense wil nie by kerke of gemeentes inskakel nie.  Middeljariges voel die kerk het stagneer en wil wyer dink, soos om nie meer in die opstanding glo nie.  Ouermense weet nie meer wat om te glo nie en wil die kerk nog hê soos hulle dit toentertyd kan onthou.  En in die proses is niemand meer tevrede nie én word geloofswaarhede rond-en-bont ingeruil vir enigiets net om meer relevant te wees vir wie ook al die grootste gehoor is.  Renesaince gemeenes wat in ‘n baie vreemde spiritualiteit glo, skiet op soos paddastoele en is skielik baie gewild.

So, ek los hierdie gedagte solank in die lug aangesien ek nog nie ‘n antwoord het nie:  het die kerk (dan praat ek van dit wat ons vandag ken) nog enige relevansie?  Vandag is dit dalk baie meer waar as ooit tevroe; kerk-los is beslis nie God-loos nie.

9 responses to “NG Kerk

  1. “Renesaince gemeenes wat in ‘n baie vreemde spiritualiteit glo, skiet op soos paddastoele en is skielik baie gewild.” Ek neem maar aan jy bedoel pinkster kerke hier.

    Ek dink die NG-kerk en die traditionele susters kerke ignoreer die pinkster beweging al vir ‘n baie lang tyd.
    Dalk doen hulle dit, sonder om te weet, tot hul eie verderf.
    Die vrae wat die pinkster beweging onder Suidafrikaners bewerk het, kan nie eenvoudig ignoreer word nie.
    As die “kerk” nie die vrae van haar lidmate toehoor of in gesprek kom daar oor nie, is sy eers maar heel onrelevant.

    Die susters kerke knuip hulle oe al vir jare toe en nou dat hulle dit oopmaak besef hulle daars nie meer veel oor nie.
    Eks nie seker of die AGS een van die paddastoele is waarvan jy praat nie, maar dis ‘n baie groot paddastoel met met dalk ‘n miljoen lidmate in SA. Ek wil so braaf wees om te sê dat die helfde van daardie lidmate die kinders van NGK, HVK en GRK oumas en oupas is. Dan het ons nog nie gepraat van die Volle Evangelie Kerk en die Pinkster Protestante Kerk nie. Hierdie kerke is nie skielik baie gewild nie, hulle is al daar van die begin van die 20ste eeu af.
    As die “kerk” nie die vrae van haar lidmate toehoor of in gesprek kom daar oor nie, is sy eers maar heel onrelevant.

    Like

  2. Andre, nee, die Renessaince gemeentes is nie die Pinskter kerke nie. Dis ‘n nuwe groep wat behoorlik nuut en anders dink oor meeste van die grondwaarhede waarmee ons groot geword het. Maar in my blog sluit ek nie die Pinksterkerke uit nie. Inderdaad het die 3 susterskerke lidmate verloor na die Pinksterkerke toe. My vraag oor relevansie is egter nie beperk tot die NG Kerk nie. My blog sluit alle kerke/gemeentes in….ek sou dus ook kon vra of daar nog enige relevansie is in die Pinksterkerke. M.a.w., breed gesien, insluitend alle kerke in alle lande…..

    Like

  3. Ag so ja. Ek dink ek verstaan wat jy bedoel. As jy met “kerk” alle gelowiges in die wêreld, onafhanklik van dinominasie bedoel dan dink ek moet ek antwoord dat die kerk nie net relevant is nie, maar die rede is waarom die wêreld nog nie in vlamme verbrand nie. Sonder die kerk sal hierdie plek uit mekaar uit val en ‘n mens hoef nie deel van die kerk te wees om dit te besef nie. Is dit hoegenaamd nodig dat ek hierdie punt staaf? Waar sal ‘n mens begin?

    Nietemin, ek het in my eerste reaksie probeer om die grense van die gesprek veel enger te maak.
    Wat is die funksie van die georganiseerde kerk in Suidafrika? Of nog enger: onder Afrikaanse, Boere mense.
    Maar dis natuurlik ‘n moeiliker gesprek.

    Like

  4. ekkedink – ek hou van die gsprek wat jy oopmaak. Ek stem nie noodwendig met alles saam nie. Lina Spies was lankal weg. Sy het dit net nou gesê. Prof. Jansen het darem ‘n erg komplekse saak waaroor hy nie sy huiswerk gedoen het nie probeer eenvoudig. Na my mening was dit maar ‘n poging om sy blaps oor sy opmerking dat hy wens dat Nelson Mandela nou maar moet doodgaan, bietjie op die agtergond te skuif.

    Ek dink egter daar is ‘n effense veralgemening in jou stuk. Daar is ook baie gemeentes waar mense oor die verskillende generasies mekaar vind en in die dieselfde gemeente vir mekaar ruimte skep en mekaar aanvaar. As jy die NG Kerk uit die Suid-Afrikaanse prentjie uithaal, dan haal jy die tweede grootste bydraer tot en rolspeler (Naas die staat) in die maatskaplike nood van die mense in ons land uit die spel uit. Net hierdie een punt maak die NG Kerk byvoorbeeld relevant. Neem nou maar ons eie gemeente. Indien ons gemeente more sy deure sou toemaak en ophou funksioneer, sal daar in ons onmiddelike omgewing tussen 80-100 gesinne wees wat volgende maak nie kos gaan hê om te eet nie. Ek “brag” nie, ek noem net ‘n voorbeeld. So is daar talle gemeentes wat ek as ‘n voorbeeld kan gebruik. DIt maak die kerk relevant.

    André – Die AGS is ongelukkig nie minder georganiseer as die susterskerke nie. Die AGS se getalle en groei en lidmaat-verloor is maar net so ‘n probleem as vir enige een van die susterskerke. Die persentasie mense wat sê hulle is lidmate van die Pinksterkerke maar nooit kerk toe gaan nie, verskil nie veel van wat die susterskerke beleef nie. Ek dink net nie ons as Christene kom ver as ons teen mekaar stelling inneem nie. Veral nie as ons daarop roem dat ons ander kerke se lidmate gevat het en dan die indruk skep dat ons skielik verskriklik gegroei het nie.

    Hierdie is nie ‘n probleem wat net vir sekere kerke ‘n probleem is nie. Ons leef in ‘n tyd waar godsdiens ‘n al hoe kleiner rol in mense se lewens speel. Die Renaisance gemeentes/groepe vervul inderdaad ‘n geestelike/spirituele behoefte wat die sogenaamde “georganiseerde kerk” nie vervul nie en daarvoor moet ons dankbaar wees.

    Maar, ek is daarvan oortuig dat baie predikante, pastore, en gemeentes tog stadig maar seker besig is om die nodig aanpassings te maak.

    Groete

    Like

    • “Die AGS is ongelukkig nie minder georganiseer as die susterskerke nie.”
      Wat bedoel jy met “ongelukkig”? Dis tog ‘n goeie ding om georganiseerd te wees.

      “Die persentasie mense wat sê hulle is lidmate van die Pinksterkerke maar nooit kerk toe gaan nie, verskil nie veel van wat die susterskerke beleef nie.”
      Wat is die persentasies? Het jy ‘n studie gelees êrens? Deel dit asb. met my, dit klink baie interesant.

      “Veral nie as ons daarop roem dat ons ander kerke se lidmate gevat het en dan die indruk skep dat ons skielik verskriklik gegroei het nie.”
      Ek dink nie julle roem julle daarin dat julle ander kerke se lidmate gevat het nie, of doen julle? Ek het nog nie iemand gehoor roem oor so iets nie. Selfs al is dit die waarheid dink ek nie iemand sal daarin roem nie.

      Het jy dalk vir my so 3 voorbeelde van wat jy met Renaisance gemeente bedoel? Daar by jou in Pta. wie is die Renaisance gemeentes?

      “Maar, ek is daarvan oortuig dat baie predikante, pastore, en gemeentes tog stadig maar seker besig is om die nodig aanpassings te maak”
      Hierdie is vir my baie interesant… wat is die nodige aanpassings?

      Like

    • attie, dankie vir jou bydrae. Ek stem saam; dis ‘n goeie vraag om jouself elke nou en dan af te vra: “as die gemeente in so-en-so vandag toe maak, wie gaan daaronder ly (indien enige)? Sal die gemeenskap/wêreld iets mis?

      Ongelukkig is dit ook nie AL waaroor kerk gaan nie né; dalk die belangrikste, maar nie al nie. Ek hoor hierdie week van ‘n skrywer wat geskryf het dat die God vir baie nie ‘n “wese” is wat hul aanspreek nie, oor verskillende goed wat God se mense al aangevang het. Nou, ons weet dat God nie daarvoor verkwalik kan word nie; dat alle Christene steeds sondaars is, so ook kerke en institute ens, ens. Maar dit bevestig my punt dat ons soms moet dink oor relevansie. Soms word ons deur diegene wat gely het onder ‘n swak Godsbegrip gedwing om daaroor te dink. Ek werk in ‘n ANC omgewing en word gereeld gekonfronteer met “die westerse Christendom”, so asof ons Christus en hulle Christus nie dieselfde is nie….. Ek begin dan maar gewoonlik om te sê dat Christus ook nie ‘n westerling was nie, maar ‘n midde-oosterling🙂 en probeer so die angel uithaal…..

      Like

  5. Andre:

    Met organiseer bedoel ek maar dat die AGS net so ‘n Institusie geword het as wat die susterskerke is. Ek dink nie dit is noodwendig sleg nie, maar die AGS beleef sonder twyfel al die kopsere wat die susterkerke ook beleef.

    Ek werk al baie jare lank saam met pastore uit die AGS en die Pinkster Charismatiese kerke. Ons het veral in my vorige werkkring selfs goeie vriende geraak. Hulle klagtes was ook maar dat hulle reken dat selfs soveel as twee derdes van mense wat sê dat hulle lidmate is, selde indien ooit eredienste bywoon of by die gemeente aktiwiteite inskakel. Hulle sien dit wanneer mense wil trou, kinders, wil inseën, mense begrawe moet word, mense siek word en in die hospitale beland. ens. Ek dink ‘n mens moet veral ook kyk na die Barna-groe se navorsing waar die negatiewe tendense nie net aan die hoofstroomkerke toegeskryf word nie.

    Jy sê in jou eersts skrywe: “Ek wil so braaf wees om te sê dat die helfde van daardie lidmate die kinders van NGK, HVK en GRK oumas en oupas is.” Wel, ek dink dit is om so ‘n bietjie te roem daarop dat julle ander kerke se lidmate gesteel het. 😉

    “Renaisance” gemeentes is maar die woord wat “ekkedink” gebruik het. Ek sien hulle spiritualiteit as anders en nie noodwendig vreemd in die sin dat hulle nie-Christelik is of nie Jesus Christus aanbid nie. Hierdie gemeentes is meestal onafanklik, nie gekoppel aan hoofstroom kerke nie. In die Pretoria omgewing is 3rd Place maar een so ‘n voorbeeld. In besonder is hulle daarop ingestel om mense te help om God met hart, siel, verstand en krag te aanbid. (Heeltemal ‘n nuwe onderwerp natuurlik.)

    Met aanpassing bedoel ek die manier waarop eredienste gehou word; die bediening van die gemeente gestruktureer word; die betrokkenheid in die gemeenskap verbeter word; die verhouding tussen leraars en lidmate is. Ens.

    Groete

    Like

    • 😀 Ék het niemand gesteel nie.
      Daardie was maar net ‘n vasstelling en dis tog die waarheid; Tradisionele kerke het duisende lidmate aan die pinkster kerke “verloor” of anders om, die pinkster kerke het duisende lidmate (soos jy sê) “gesteel”.
      Hoekom? Wat het daar gebeer? Vir my is dit interesant al is dit geskiedenis.

      Like

  6. Ek wou ‘n nuwe blog skryf, maar dink toe om dit sommer hier by te voeg.

    Ek lees vanoggend hierdie (http://www.churchleaders.com/pastors/pastor-articles/167379-philip-wagner-secret-pain-of-pastors.html?p=1) oor die pyn waardeur pastors gaan. En ek kan daarmee vereenselwig, ek was daar…. Maar dit het my onwillekeurig laat wonder oor van die dinge wat ek hierbo geskryf het. Die stuk gee goeie raad aan pastors; hoe om mense en hulle “woord-steke” te hanteer, hoe om dit te hanteer as mense die kerk verlaat ens. Maar ons moet dalk ook net bietjie balans in die debat bring om te sê: pastors, kyk wat en hoe jy die evagelie verkondig. As jy ‘n nuwe moralisme verkondig, kan ek dit heeltemal verstaan as mense gaan loop. As jy mense so moeg maak met die “dinge van die kerk”, as jy mense so besig hou dat hul nie by God en hul gesinne kom nie, dan gaan mense loop en ‘n plek soek waar hulle geestelik gevoed kan word. Ek dink die kerk het vir jare te veel klem gelê op kerlike aktiwiteite as bewys van attestaat, sonder om mense toe te rus om daar waar hulle 8+ ure van die dag is, te help om “Christus” uit te leef. Dit (my werks omgewing) is ook deel van ons “gaan na die wêreld”; van die amp van lidmaat.

    Like

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s